ಬೆಂಗಳೂರು: ಇತ್ತೀಚಿನ ದಿನಗಳಲ್ಲಿ ಗರ್ಭಿಣಿಯರಲ್ಲಿ ಸಿಸೇರಿಯನ್ (ಸಿ-ಸೆಕ್ಷನ್) ಹೆರಿಗೆ ಮಾಡಿಸಿಕೊಳ್ಳುವ ಪ್ರವೃತ್ತಿ ಗಣನೀಯವಾಗಿ ಹೆಚ್ಚಾಗುತ್ತಿದ್ದು, ಇದು ಅತ್ಯಂತ ಅಪಾಯಕಾರಿ ಬೆಳವಣಿಗೆಯಾಗಿದೆ ಎಂದು ಖ್ಯಾತ ಸ್ತ್ರೀ ರೋಗ ತಜ್ಞರು ಕಳವಳ ವ್ಯಕ್ತಪಡಿಸಿದ್ದಾರೆ. ಹೆರಿಗೆಯ ನೋವಿನಿಂದ ತಪ್ಪಿಸಿಕೊಳ್ಳಲು ಯಾವುದೇ ಕಾರಣಕ್ಕೂ ಸಿ-ಸೆಕ್ಷನ್ ಅನ್ನು ಒಂದು ಸುಲಭ ಆಯ್ಕೆ ಅಥವಾ ‘ಶಾರ್ಟ್‌ಕಟ್’ ಆಗಿ ಬಳಸಬಾರದು ಎಂದು ಅವರು ಗಂಭೀರ ಎಚ್ಚರಿಕೆ ನೀಡಿದ್ದಾರೆ.
ತಾಯಿ ಅಥವಾ ಮಗುವಿನ ಜೀವಕ್ಕೆ ಅಪಾಯವಿದ್ದಾಗ ಅಥವಾ ಆರೋಗ್ಯದ ತುರ್ತು ಪರಿಸ್ಥಿತಿ ಎದುರಾದಾಗ ಮಾತ್ರವೇ ವೈದ್ಯಕೀಯವಾಗಿ ಸಿಸೇರಿಯನ್ ಶಸ್ತ್ರಚಿಕಿತ್ಸೆಯನ್ನು ಶಿಫಾರಸು ಮಾಡಲಾಗುತ್ತದೆ ಎಂದು ತಜ್ಞರು ಸ್ಪಷ್ಟಪಡಿಸಿದ್ದಾರೆ.
ಸಿಸೇರಿಯನ್ ಹೆರಿಗೆಯಿಂದಾಗುವ ಪ್ರಮುಖ ಪಾರ್ಶ್ವವಾಯುಗಳು:
- ಬೆನ್ನುನೋವು ಮತ್ತು ತಲೆನೋವು (Spinal Headache): ಸಿಸೇರಿಯನ್ ಶಸ್ತ್ರಚಿಕಿತ್ಸೆಯ ಸಮಯದಲ್ಲಿ ಬೆನ್ನಿಗೆ ನೀಡಲಾಗುವ ಅರಿವಳಿಕೆ (Anesthesia) ಇಂಜೆಕ್ಷನ್‌ನಿಂದಾಗಿ ಹೆರಿಗೆಯ ನಂತರ ತೀವ್ರ ತಲೆನೋವು ಕಾಣಿಸಿಕೊಳ್ಳುತ್ತದೆ. ಇದನ್ನು ವೈದ್ಯಕೀಯ ಭಾಷೆಯಲ್ಲಿ ‘ಸ್ಪೈನಲ್ ಹೆಡ್‌ಏಕ್’ ಎಂದು ಕರೆಯಲಾಗುತ್ತದೆ.
- ಅಂಗಾಂಗಗಳು ಅಂಟಿಕೊಳ್ಳುವ ಭೀತಿ: ಸಿಸೇರಿಯನ್ ಮಾಡಿಸಿಕೊಂಡವರಲ್ಲಿ ಗರ್ಭಕೋಶವು ಅದರ ಪಕ್ಕದ ಇತರ ಒಳಗಿನ ಅಂಗಾಂಗಗಳಿಗೆ ಅಂಟಿಕೊಳ್ಳುವ (Adhesions) ಸಾಧ್ಯತೆ ಇರುತ್ತದೆ. ಇದು ಮುಂದಿನ ದಿನಗಳಲ್ಲಿ ತೀವ್ರ ಆರೋಗ್ಯ ಸಮಸ್ಯೆಗೆ ಕಾರಣವಾಗಿ, ಮತ್ತೊಮ್ಮೆ ಸರ್ಜರಿ ಮಾಡಬೇಕಾದ ಪರಿಸ್ಥಿತಿಯನ್ನು ತಂದೊಡ್ಡಬಹುದು.
- ದೀರ್ಘಾವಧಿಯ ಚೇತರಿಕೆ ಸಮಯ: ಶಸ್ತ್ರಚಿಕಿತ್ಸೆಯ ಗಾಯ ಸಂಪೂರ್ಣವಾಗಿ ಗುಣವಾಗಲು ಕನಿಷ್ಠ 6 ವಾರಗಳ ಸಮಯ ಬೇಕಾಗುತ್ತದೆ. ಈ ಅವಧಿಯಲ್ಲಿ ಗಾಯದ ಸ್ವಚ್ಛತೆ ಮತ್ತು ಪೌಷ್ಟಿಕ ಆಹಾರ ಸೇವನೆಯಲ್ಲಿ ನಿರ್ಲಕ್ಷ್ಯ ವಹಿಸಿದರೆ ತಾಯಿ ತೀವ್ರ ಸೋಂಕು (Infection) ಮತ್ತು ದೈಹಿಕ ತೊಂದರೆಗಳನ್ನು ಅನುಭವಿಸಬೇಕಾಗುತ್ತದೆ.
- ಮುಂದಿನ ಹೆರಿಗೆಗಳ ಮೇಲಿನ ಪ್ರಭಾವ: ಸಾಮಾನ್ಯವಾಗಿ ಒಂದು ಬಾರಿ ಸಿಸೇರಿಯನ್ ಆದರೆ, ಎರಡನೇ ಹೆರಿಗೆಯೂ ಸಿಸೇರಿಯನ್ ಆಗುವ ಸಾಧ್ಯತೆಯೇ ಹೆಚ್ಚಿರುತ್ತದೆ. ಕೆಲವೊಂದು ಅಪರೂಪದ ಸಂದರ್ಭಗಳಲ್ಲಿ ಮಾತ್ರ ಎರಡನೇ ಬಾರಿ ಸಹಜ ಹೆರಿಗೆ (ನಾರ್ಮಲ್ ಡೆಲಿವರಿ) ಸಾಧ್ಯವಾಗಬಹುದು. ಆದರೆ, ಇದರಲ್ಲಿ ತಾಯಿ ಮತ್ತು ಮಗುವಿಗೆ ಅಪಾಯದ ಪ್ರಮಾಣ ಅತ್ಯಂತ ಹೆಚ್ಚಾಗಿರುತ್ತದೆ.
ತಜ್ಞರ ಸಲಹೆ: ನೈಸರ್ಗಿಕ ಹೆರಿಗೆಯೇ ತಾಯಿ ಮತ್ತು ಮಗುವಿನ ಆರೋಗ್ಯಕ್ಕೆ ಅತ್ಯುತ್ತಮ. ಕೇವಲ ಹೆರಿಗೆಯ ಭಯದಿಂದಾಗಿ ಅಥವಾ ಮುಹೂರ್ತದ ಕಾರಣಗಳಿಗಾಗಿ ಸಿಸೇರಿಯನ್ ಆಯ್ಕೆ ಮಾಡಿಕೊಳ್ಳುವುದು ಸೂಕ್ತವಲ್ಲ. ಗರ್ಭಾವಸ್ಥೆಯಲ್ಲಿ ಸರಿಯಾದ ಜೀವನಶೈಲಿ ಮತ್ತು ವೈದ್ಯರ ಸೂಕ್ತ ಮಾರ್ಗದರ್ಶನ ಪಡೆದರೆ ಸಹಜ ಹೆರಿಗೆಯನ್ನು ಸುಲಭವಾಗಿಸಿಕೊಳ್ಳಬಹುದು.
