ಬೆಂಗಳೂರು: ರಾಜ್ಯದ ಸರ್ಕಾರಿ ಶಾಲೆಗಳಲ್ಲಿ ಖಾಲಿ ಇರುವ ಶಿಕ್ಷಕರ ಹುದ್ದೆಗಳ ಭರ್ತಿಗೆ ಕಾಯುತ್ತಿದ್ದ ಉದ್ಯೋಗಾಕಾಂಕ್ಷಿಗಳಿಗೆ ರಾಜ್ಯ ಸರ್ಕಾರವು ಸಿಹಿ ಸುದ್ದಿ ನೀಡಿದೆ. ದೀರ್ಘಾವಧಿಯ ಬಳಿಕ ಪ್ರಾಥಮಿಕ, ಹಿರಿಯ ಪ್ರಾಥಮಿಕ, ಪ್ರೌಢಶಾಲೆ, ದೈಹಿಕ ಶಿಕ್ಷಣ ಹಾಗೂ ಕಂಪ್ಯೂಟರ್ ಸೈನ್ಸ್ ಒಳಗೊಂಡಂತೆ ಒಟ್ಟು 15,000 ಶಿಕ್ಷಕರ ನೇಮಕಾತಿಗಾಗಿ ಕರಡು ಗೆಜೆಟ್ ಅಧಿಸೂಚನೆಯನ್ನು ಹೊರಡಿಸಲಾಗಿದೆ.
ಆಕ್ಷೇಪಣೆ ಸಲ್ಲಿಕೆಗೆ 15 ದಿನಗಳ ಕಾಲಾವಕಾಶ
ಪ್ರಕಟಿಸಲಾಗಿರುವ ಈ ಕರಡು ಅಧಿಸೂಚನೆಗೆ ಸಂಬಂಧಿಸಿದಂತೆ ಯಾವುದೇ ಆಕ್ಷೇಪಣೆಗಳಿದ್ದಲ್ಲಿ ಸಾರ್ವಜನಿಕರು ಹಾಗೂ ಅಭ್ಯರ್ಥಿಗಳು ಸಲ್ಲಿಸಲು 15 ದಿನಗಳ ಕಾಲಾವಕಾಶ ನೀಡಲಾಗಿದೆ. ಈ ಪ್ರಕ್ರಿಯೆ ಮುಗಿದ ನಂತರ ಅಧಿಕೃತ ನೇಮಕಾತಿ ಅಧಿಸೂಚನೆ ಹೊರಬೀಳುವ ಸಾಧ್ಯತೆಯಿದೆ.
ಇದಕ್ಕೂ ಮುನ್ನ 2022 ರಲ್ಲಿ ನಡೆದಿದ್ದ ಜಿಪಿಟಿ ನೇಮಕಾತಿ ಪ್ರಕ್ರಿಯೆಯು ಮಹಿಳಾ ಅಭ್ಯರ್ಥಿಗಳ ತಂದೆ/ಪತಿ ಆದಾಯ ಪ್ರಮಾಣಪತ್ರದ ವಿವಾದದಿಂದಾಗಿ ನ್ಯಾಯಾಲಯದ ಮೆಟ್ಟಿಲೇರಿತ್ತು. ಇತ್ತೀಚೆಗಷ್ಟೇ ಈ ಪ್ರಕರಣ ಸುಖಾಂತ್ಯ ಕಂಡಿದ್ದು, 13,451 ಅಭ್ಯರ್ಥಿಗಳು ಅರ್ಹತೆ ಪಡೆದುಕೊಂಡಿರುವುದನ್ನು ಇಲ್ಲಿ ಸ್ಮರಿಸಬಹುದು.
ವಯೋಮಿತಿಯಲ್ಲಿ 3 ವರ್ಷ ಸಡಿಲಿಕೆ
ಕೊರೊನಾ ಹಾಗೂ ನೇಮಕಾತಿ ವಿಳಂಬದ ಹಿನ್ನೆಲೆಯಲ್ಲಿ ಅಭ್ಯರ್ಥಿಗಳಿಗೆ ಅನುಕೂಲ ಮಾಡಿಕೊಡಲು ಸರ್ಕಾರ ವಯೋಮಿತಿಯಲ್ಲಿ 3 ವರ್ಷಗಳ ಸಡಿಲಿಕೆ ನೀಡಿದೆ.
- ಸಾಮಾನ್ಯ ವರ್ಗ (General): 38 ವರ್ಷ
- ಒಬಿಸಿ (OBC): 41 ವರ್ಷ
- ಪರಿಶಿಷ್ಟ ಜಾತಿ/ಪಂಗಡ (SC/ST) ಮತ್ತು ಅಂಗವಿಕಲರು: 43 ವರ್ಷ
ಶಾಲಾವಾರು ಹುದ್ದೆಗಳ ವಿವರ
ಒಟ್ಟು 15,000 ಹುದ್ದೆಗಳನ್ನು ಈ ಕೆಳಗಿನಂತೆ ವಿಂಗಡಿಸಲಾಗಿದೆ:
- ಹಿರಿಯ ಪ್ರಾಥಮಿಕ ಶಾಲೆ (ಜಿಪಿಟಿ): 8,500 ಹುದ್ದೆಗಳು
- ಪ್ರೌಢಶಾಲೆ: 4,500 ಹುದ್ದೆಗಳು
- ಪ್ರಾಥಮಿಕ ಶಾಲೆ: 900 ಹುದ್ದೆಗಳು
- ಕಂಪ್ಯೂಟರ್ ಶಿಕ್ಷಣ ಬೋಧನೆ: 500 ಹುದ್ದೆಗಳು
- ದೈಹಿಕ ಶಿಕ್ಷಣ ಗ್ರೇಡ್-1: 450 ಹುದ್ದೆಗಳು
- ದೈಹಿಕ ಶಿಕ್ಷಣ ಗ್ರೇಡ್-2: 150 ಹುದ್ದೆಗಳು
ಜಿಲ್ಲಾವಾರು ಹಂಚಿಕೆ ವಿವರ
- ಇತರ ಜಿಲ್ಲೆಗಳು: 8,095 ಹುದ್ದೆಗಳು
- ಕಲ್ಯಾಣ ಕರ್ನಾಟಕ (KK) ಜಿಲ್ಲೆಗಳು: 6,905 ಹುದ್ದೆಗಳು
ವೇಟೇಜ್ ನಿಗದಿಪಡಿಸುವ ಮಾನದಂಡಗಳು
ನೇಮಕಾತಿ ಪ್ರಕ್ರಿಯೆಯಲ್ಲಿ ಅಭ್ಯರ್ಥಿಗಳ ಆಯ್ಕೆಗೆ ಈ ಕೆಳಗಿನಂತೆ ಅಂಕಗಳ ವೇಟೇಜ್ ಪರಿಗಣಿಸಲಾಗುತ್ತದೆ:
- ಪ್ರಾಥಮಿಕ ಶಾಲಾ ಶಿಕ್ಷಕರು (ಪಿಎಸ್ಟಿ): ಸಿಇಟಿ (CET) – 70 ಅಂಕಗಳು, ಟಿಇಟಿ (TET) – 20 ಅಂಕಗಳು, ಪಿಯುಸಿ (PUC) – 8 ಅಂಕಗಳು ಮತ್ತು ಡಿ.ಇಡಿ (D.Ed) – 2 ಅಂಕಗಳು.
- ಜಿಪಿಟಿ ಶಿಕ್ಷಕರು: ಸಿಇಟಿ (CET) – ಶೇ. 85, ಪದವಿ – ಶೇ. 13 ಮತ್ತು ಬಿ.ಇಡಿ (B.Ed) – ಶೇ. 2 ಅಂಕಗಳು.
- ಕಂಪ್ಯೂಟರ್ ಸೈನ್ಸ್ ಶಿಕ್ಷಕರು: ಸಿಇಟಿ (CET) – 70 ಅಂಕಗಳು ಮತ್ತು ನಿಗದಿತ ಪದವಿಯ ಅಂಕಗಳ ಆಧಾರದ ಮೇಲೆ ಉಳಿದ 30 ಅಂಕಗಳನ್ನು ಪರಿಗಣಿಸಲಾಗುತ್ತದೆ.
